☆RINAWMIN☆ - 9 By Dingdi Pachuau

☆RINAWMIN☆ - 9 By Dingdi Pachuau

"Chhûngkua kan ni tawh a, chhûngkua anga min en a nih chuan  mi bula min sawi min sawina tùr a awm lo. Tuin nge mahni chhûngkaw chanchin làwmawm lo lam mi bula sawi sawi ngai? Kei pawhin in tlin lohna hi mi bulah ka sawi ka sawi ngai lo, tlin lohna lai nei, fel famkim lo kan nia, mi zînga sawi sawi chi a ni ngai lo. Ka fate in nia, ka mit in tlun lohna leh in chêt fel lo deuh ka tih laite chu ka hrilh ang che u chu, mi dang hrilh lovin. Hetiang a nihte chuan zilh pawh ka zilh ngam nâng che u," a ti leh bawrh bawrh a. Sawi ve tùr hre lo chuan ka lo ngawi reng a, ani pawh chu sawi zo a inti tawh nge ni, bathroom lamah a lût zui ta nghâl a.

Chhani'n ka nu chanchin a lo sawi  tih chu âwih harsa ka ti, helai hnaia awmte hi chu a hriat țhante hlîr an ni tih chu ka hre tho a; mahse, han kawmngeih deuh, chanchin a chhia a țha han sawipui tùr ëm chu a neiin ka hre lo, bâkah, ka nuin a lo hre leh kher a nih hmèl bawk si a, tu chuan nge maw ka nu chu hrilh rêng rêng ni?

Zànah a thuphungin ka zâwt mai mai a, a thuphung tak takin. Ani pawh chuan a zêp hran lo," Dàwr ka kal kha Pi Chali sâwn min lo fiam a,' An duat che em?' tiin, min duat thu ka sawi ve mai a, ani chuan,' Nu ber saw a khirh ve deuh a, i biak țhat ve deuh chu a ngai ang. Family Head a nia, i biak țhat loh chuan nuam i ti lo ang, nuam i tih nân biak țhat viau a ngai a nih chu,' nui deuh chung hian a ti leh a, kei pawh chuan,' Kan be țha viau anga ni mai alawm, mi biak țhatte chu mi biak chhiat aiin a har lo daih zâwk bawk sia,' nui chung tho hian ka ti ve a, chu bâk chu ka nu chungchâng ka la sawi chhuak miah lo, kha ka thil sawi kha engtin emaw a lo kuai her deuh tihna em ni dâwn le?" a lo ti ve mai a.

A thil sawi hi ka ring hmiah. Pi Chali chuan ka nu bulah engtin emaw tak thu belh deuhin, ngeiawm thei tùrin a lo sawi a ni a ni ngei ang, ka puh chhe viau maithei a; mahse, Pi Chali bulah bâk a sawi si loh chuan ani lo chu mi dang an ni thei lo ang.

"Ka nu hi chu hriat thiam a ngai ve a, i hriat sa vek kha. A mizia hi heti hi a nia, i biak hmasak a ngai țhìn. Ko la, be bawrh bawrh rawh, a chhâng duah lo che a nih pawhin inthlahrun loh tùr, nuam ti lo miah suh. I nu a nia, chhûngkua kan nia, a lo zilhin thil a lo sawisêl deuh a nih pawhin chhûngkua chu kan inhauin kan inzilh ve bawk ang chu tiraw?" ka han ti a, ani pawh chuan," A dik alawm, engah mah ka ngai lo," a lo ti ve mai a.

Boruak dang a awm zui pawhin ka hre lo. Chhani pawh chu ka hrilh vàng nge, a hma aiin ka nu chu a ko zing tain ka hria. A țha, ko mawlh mawlh se, ka nu pawhin a ngaina ve mai ang. Min ko mawlh mawlhtu chu tu'n kan hai der reng thei lo, min ko ngai lëm lo ai chuan min ko zing deuhtu na nâ nâ chu kan ngaihsak țhìn alawm le.

A nute'n zanriah eiah min sâwm a, kan zu ei ve a, an mâkpa ka ni ve tawh bawk a, min lo duat thiam khawp maiin ka hria. Pa ber lakah erawh ka inthlahrung ru deuh a, a fanu duat tak hi mawihnai takin pasal neihtîr a tum ve țhìn ngei àwm si a, chu chu kei hian ka puitlintîr si lo; mahse, chûng chu ka ngaihtuahna mai mai a nia, ani chuan a ngaihtuah ve tawh lêm lo nge, ka chungah țhat a lo chhuah a, sa țha lai deuh nia a hriatte min lo suahsak bawk a, nu ber pawhin ei țeuh tùrin min hrilh ve reng bawk.

Ka puar khawp mai, kan inneih hlim khân chaw eia sâwmtu kan nei ve neuh neuh a, anni pawh hian vawi khat chu min sâwm tawh ngei mai ; mahse, Chhani thil ei țha thei lo khân min tisuakbãk a, amah ang thovin ka ei mang lo. Tunah erawh ani pawhin a ei țeuh tawh a, kei pawhin ka ei țeuh mai, puzawnte ina chaw ei man a awm nge nge e.

"I chêr ka ti deuh a, thil i ei țha lo em ni aw ka lo ti. Rai lai i nia, nau țha tùr chuan i hrisel țhata thil i ei țhat a ngai. Bâkah, rilru hahin awm lo la, a hlimawm lam chauh ngaihtuah tum ang che," chaw ei kham lama TV hmaa kan țhut khâwm lai chuan nu ber chuan a ti sap sap a, pa ber erawh chuan," Dika, UFC hi i en ve țhìn em? An inbeih dàn hi pà ka tih zâwng tak mai a nia, mipa sport dik tak a ni ka ti ve tlat," a lo ti ve thung a. Hmeichhia leh mipa titi, thil vei zawng leh duh zâwng hi chu a inang lo ţhìn teh e.

Chhani'n Bean leh artui kan pawlh a ei châk avàngin Bean rah min hawn chhohtîr a, ka hnial lui ve viau a, nu berin," Kan neih remchàn lai a nia, keng chho r'u, kan ngaina tehchiam lo, in rawn kal fuh zàn a ni mai," a ti tlat a, anni pawhin an lei ve tho a ni si a, ka inthlahrung a ni. Zuar an awm ve țhìn a, chutia Chhani'n a ei châk chuan kan lei ve mai tùr hi a nia.

A tûk tlaia ka hna thawk haw chuan in ka luh ruala ka nu âng hmarh hmarh thãwm chu ka hre zui zat a, dàwr a nghâk lo tihna. Eng lamah nge a lo lungawi loh leh tâk ang aw ka ti rilru a, ka pain min lo hmuh chuan," I hah em? Vawiin khua kha chu ni dang zawng aiin a lum zualin ka hria, a lum hem hem ngawt lo maw?" a lo ti luam a. Hetih lai pawh hian ka nu chu a la âng chhunzawm reng, a thil sawi chu," Tûnlai miho hi zawng, kan hunlai min tluk lo țhìn êm mai. Bâkah, ei châk neih chuan sawi mai tùr a ni, kan lei mai ang," tih lam a ni, eng ber chu nge a àn chhuah chhoh țanna chu ni ang aw?

Chhani'n thingpui min rawn pe a, a hmêl chu hlim lo riauin ka hria a, a nui lui sak nain ka mit takah pawh min en ngam lo. Ka nu hian a lo àn khum leh a ni chiang, ka nu țhìn hi chu aw.  Kan chhûngkuaah rawn tel tawh mah se mi dang fahrin a ni a, inàn khum bawrh bawrh chu tu mahin nuam an ti lo ang, amah (ka nu) ngei pawh hian maw le. Thil hi hre thiam tùr a ni asin, amah ang vek tùrah hian min ngai țhìn a, amah pawh hi àn khum ila hrehawm a ti ve tho àwm si a.

Kan zanriah ei boruak pawh a nuam lo ka ti, kan eng emaw ti țhûmin ka hria. Ka pa chuan Chhani chu a be zauh zauh a, ani pawhin pângngai tak chuan a chhâng ve tho. U Zovi pawh a țawng zauh zauh a, ka nu erawh a țawng lo hrim hrim, kan be hmasaa zawhna kan zâwt a nih ngawt loh chuan. 

Khumah a mutna lamah, sîr tâwkah min hnungchhawn zâwngin a mu tlat a, ka biak pawh chuan," Aw," tih emaw, "Aih," tih emaw bâkin min chhâng lo. Va hnaihin ka va kuah a," I lungawi lo a ni maw? I thin ka tirim em? Min hrilh la, lungawi lohna i neih chuan min hrilh vek rawh. Thil thleng a awm pawhin min hrilh vek la aw, i pasal ka nih hi," ka ti a, nghet tak hian ka kut chu a lo chelh a.

"Kan inah haw leh daih ka duh êm mai, ka rilru a hrehawm," a lo ti sap a, kei chuan," E khai! Chutiang chu ngaihtuah lo la tiraw? I haw daih te chuan engtin nge ka awm ang? I rilru hrehawmna chu min han hrilh phawt teh," ka ti a, ka lam hawi thei tùr chuan ka kuai her a, a mittui a lo tling pam mai.

"Ka duat hi engah nge a rilru a lo hrehawm mai mai le aw? Ka phal lo asin. Le, engkim min han hrilh teh le," ka ti dap dap a, ani chuan insût deuh hraihin," A ho lutuk a, sawi vak chi pawh a ni lo," a lo ti lehlawi a.

"Ho lo tawp ang, i rilru hrehawmna chu a ho thei lo hrim hrim, ka nu vàng a ni tiraw?" ka ti ve thung a, ka nu àn vàng kha a nih ka ringhlel lo.

"Umm... englo a nia. Bean kha, ka nute min hawntîr kha, kha vàng kha a nia, a ho lutuk!" a ti leh a. Ka lo ring dik chiah, ka nu vàng a lo nih leh chiah chu. A kip a kawiin hre lo mah ila, Bean kan hawn chhoh khân kan in chhûngah buaina a thlen tihna a ni a, Bean erawh mawhpuh theih a ni lo ang, Chhani'n a ei châk a, kan hàwn chho a ni ve mai.

"I nu hian min ngei pah ve hrim hrim tiraw? Kan inneih hma pawh khân min duh vak lo tih ka hre sa a," insût hraih hian a ti sap sap a, ka thaw hawk mai. Ni e, ka nu hi chuan a awt ngai lo, min duhpui ngai lo a nih kha; mahse, tunah chuan ka nupui a ni tawh a, min duhpui ve tùr a ni tawh. A sawi dàn takah a fanu a ni tawh a, a ngeiin a duh lo tawh tùr a ni lo.

"'Khatin ti lo la, i lungawi loh lai a nia, ka hre thiam lutuk che aw, ni dangah chuan 'I nu' tih tawh miah loh tùr. Chuan, ka nu hi chu a âng peih a, a âng leh buan buan țhìn, a insûm hlei thei țhìn lo va. A huat êm êm váng che pawh a ni lo, keini a fahrinte chungah pawh hian a âng buan buan fo a nia, hre thiam hrâm hrâm la aw, i fel êm kha," tiin, ka thiam tâwk chuan ka hrilh fiah a, duat takin a bân chu ka chùlsak a.

"Nia... ka thiam loh pawh a ni ve tho,  Bean kan a duh dàn kha a sawi reng a, chutiang chuan ka ti lo va," a ti leh a. Ka rilru an tihrehawm dùn viau nain chu thil chuan ka nuih a tiza ta tlat pek a, ka nuin a duh dàn a sawi reng laia pakhatin a tihsak si lo lai tak chu, ka nu lungawi loh dàn tùr chu ka ngaihtuah a, ka nuih a za lo thei lo.

"Chu vàng a lo nih dâwn chu. Ka nu hi chu a lung a lian a, a âng ve peih a; mahse, a rei ang a, nakinah chuan ngaihah i nei mai ang, chutiang deuh chu a ngai," te ka ti ta vêl mai mai. Ka nu bulah erawh zawh fiah ka tum tho, insûm ve hrâm hrâm tùr pawhin ngen a țha. Âng tlêm deuh tùrin hrilh ila, a chhan chu nau kan pai mêk a, nau hrisêl țha tak nei tùr chuan a paitu, a nu rilru a hahdam a ngai, hrehawm ti taka hun a hman chuan nauin a tuar ngei ngei dâwn tlat.

*MI TLIN LOHNA HMU THEI TAKTE HI MAHNI TÂWKA CHAPO VE TAK, ENG MAH NI SI LO AN NI DUH*