☆RINAWMIN☆ - 14 By Dingdi Pachuau

☆RINAWMIN☆ - 14 By Dingdi Pachuau

Aizawla awm reng theih a ni bîk lo va, a zia deuh hnuah ti mai ang, in lamah inenkawl rih tùrin kan inhàwn phei a, ani pawhin in lam a ngai ve tawh bawk a, Bawihtei a hmu châk ve tawh bawk nèn, kan haw phei hi a tân damdawi țha tak ni se ka ti hlê a ni.

Bawihtei nèn an han inhmu chu an mittui a tla dùn ve ve a, kei pawh ka bãng chuang lo, Bawihtei hlim hmêl chuan ka hnuk a tino a, Chhani mittui tla chuan ka rilru a tina ve thung, ka thinlung hi a na ngawih ngawih mai a ni. Nufa inngai tak an ni a, nakinah chuan an la ințhen ngei ngei dâwn tih ka hre chiang mai si a; tu mah hian kan hma hun tùr hre lo mah ila, Chhani natnaah kher hi chuan ka beidawng chiang hlê a ni.

Țhenawm khawvêng an bengvâr hlê a, rawn chuangkai tâwk an awm ve reng mai, chuvàng chuan chhùn lamah hi chua rilru a kal ding lo deuh hlek a, zàn lam hi ka huphurh țhìn. Ka rilru a vâk kual nasa țhìn a, ka bei hi a dawng ngawih ngawih a ni ber. Chhani chu ka en reng țhìn a, ka khawngaihin a tawrh ai chu tuar thei ila tiin ka ngaihtuah ziah, ani ai hi chuan ka taksa a chak zâwk si a, ka tuar na lo deuh zâwk ang tiin. Duh lo teh mah ila min kalsan hun tùr ka ngaihtuah lo thei lo va, mipa e ti lo chuan ka mittui hi a rawn tla leh zawih zawih țhìn, a hmuh lai erawh chuan ka insûm a, hlim hmêl ka pu lui ve hrâm hrâm țhìn thung. 

Kohhranhovin min țawngțaipui reng a, kan kohhran mai ni lovin kan vêng chhûnga kohhran hrang hrangte leh mimal pawhin țawngțaina lamah min dìlpui reng tih pawh ka hria, ka làwm viau rualin țawngțaipui ngai dinhmuna han din chu a râpthlâk ka ti a; mahse, tih theih kan nei bawk si lo. Kei pawh a hma zawng aiin ka țawngțai nasa a, Chhani damna ka duh ber a nih miau avàngin ka dîl tlut tlut mai a ni, chutih rual erawh chuan a dam beiseina erawh ka nei sâng lo hlê thung.

Ka nuin a châng chângin dàwr a nghâk a, keiin in lamah Chhani ka awmpui a, lo lêng an awm ve reng reng si a, ka pa pawh a vir buai ve thei viau mai. Mahni tâwkah kan buai țheuh ti ila a dik ang, Chhani damloh ațang chiah hian mi lo felzia hi ka hriat chian phah a ni, an hman reng bîk lo tih ka hria, chutih rual chuan kan mangan khawhar hlauin ka ti mai, an rawn chuangkai ve reng a, kan chhûngkaw phû loh a ni tih ka hre chiang hlê a ni.

A chângin kan han buai ve leh nak țhìn a, damdawi in lama tlàn dàwr dáwr châng pawh kan nei tho. Heti reng kan nih vàng hian thlâ a muang thei hlawl lo va, ka hma lam hun tùr ka ngaihtuah lo thei lo va, hlim nî hi ka nei thei hlawl lo a ni ber. Aizawl lama inenkawla va awmchilh deuh ráwt pawh ka ngaihtuah ve fo a; mahse, hun rei tak min dampui dawn lo tih rinna ka neih len êm avàngin a boral hma hian kan chhûngkua hian hun hmang tlâng tam ila, Bawihtei nèn hian awm dùn tam se tih ka duh avàngin a theih chen chen chu kan inah kan enkawl a ni. Kei ngei pawh rilru lamah lo inbuatsaih lâwkin min kalsan huna nâ ka tih lutuk lohna tùrin ka infuih lâwk nasa khawp a, huphurh eng ang pawh ni ila a tel lovin Bawihtei ka enkawl chhoh a ngai ngei dâwn tih ka hre tlat sî a ni. 

Chhani țhiante pawh an fel hlê a, an țhiannu chu hun ãwl an neih phawt chuan an rawn kan a, an rawn kàwm hlim a, a tân țhian nih an rawn tlin țhìn khawp a ni; mahse, anni pawh an hman reng thei bîk lo va, in hranga awm ta chu an buai ve nak nak lo thei si lo nèn, an lo lèn hun nghâkin ka ring ka lo fán ka lo fàn țhìn a ni.

Hun a ral a, cancer natna hi zawng keini ang ramah hi chuan thih ngei ngeina tùr natna a nih miau avàngin a natna kan hriat chhuah ațanga kum khat leh thla hnihnaah chiah Chhani chuan min boralsan ta a, a han boral chiah chu ka rilrua ka lo inbuatsaih rûk vena zawng zawng kha chu eng mah lo mai a ni. Ka tliak hnâwp ni maiin ka hria a, ka khawvêl hi a thim nghâl vek bawk. A hmêl chu ka en țhìn, a hmêl țha tak țhìn leh a vun no sar țhìn kha a dâng lap mai a, tisen hmuh tùr a awm lo, a nulât lai hmêl hmu țhìn tân chuan tuna a hmêl lan dàn hi chu hai loh chi rual a ni lo ang, a danglam lutuk tawh, a chêr lutuk tawh a, pitar hmêl hial a ang tawh záwk; mahse, ka tân chuan a nulât lai ang thoa ennawm ang mai kha a la ni, ka hmangaih hmêl kha a ni miau a, ka en ning lo, a hmêl ka hmuh hun chhûng ni se a rei dâwn si lo va. 

Ruang thlâk zàn chuan chhìn khat tê pawh ka chhîng lo, Bawihtei kuahin ka mu a, ani chu ka âwm nghèngin a nuin min awm lohsan ta a ni tih pawh hrechang lovin a muhìl sâk sâk thung. A hmêl chu hnukulh țeuhin ka thlîr a, nu tel lova a seilian tùr chu ka ngaihtuah zui a, a la naupang si, kei hian engtin nge maw ka enkawl chhoh tehlul ang le? Nu ngai rual lek a la ni a, zanin ațang hian a nu tel lovin hun a hmang chho ve țan ta chu a ni tak si a, ka va khawngaih tehlul êm!! Chhani, kan pafa hian kan la mamawh êm che asin, i tel lovin engtin nge maw kan rawn inenkawl chhoh ang le? Min kalsan hma lua a ni tiraw? Țap chhuak lo tùrin ka insûm hrâm hrâm a, ka mittui erawh ka dang zo ngang lo.

A tûka kan pafaa thlàna kan va kal erawh chuan ka țap chhuak ta hawk hawk a, Bawihtei hrilhhai dàn tùr pawh chu ka ngaihtuah phâk tawh lo, a rawn baw chhuak hawk hawk a ni ber mai. Amah zâwk chuan min rawn kuah a," Âpa...??" a ti làwi rât a, ani pawh chu keimah vàngin a lungchhia a ni tih ka hria. 

Ka lungchhe zualpui a reh hnuah chuan," Bawihte, min ngaidam rawh aw, i nu nunna pawh ka chelh ding zo si lo va," ka ti a, ani chuan," Ani chu Pathian hnênah a awm daih tawh alawm, nuam a ti dâwn asin, a nunna chelh din chu a duh teuh lo ang!" a lo ti vei reuh a, a pi leh pu hrilh a ni ngei ang chu. Ka mittui kâr ațang chuan ka fanu hmêl chu ka han en a, a nu a chhùn hliah hliah mai si a, a hmêl hian a nu min hriat chhuahtïr zêl dáwn a ni àwm si a, min va vèl ngun dâwn tak êm!

Nupui tel lova hun han hman zet zawng, thil engkim mai hi a dik lo vêl vek ni maiin ka hria, kim lo hûih tlata inhriatna ka hria a, a dik rêng bawk a, ka kim hlawl lo a ni. Chhani hmun ruak a zau lutuk a, kan in hrim hrim pawh hi a ruak ngawih ngawih a ni ber. Zànah Bawihtei nen kan mu a, kan khum ruak ta lutuk, nu ber mutna lam ruak ta hiai mai ka hmuh apiangin ka khawhar lunglêng, ipik bawk si chu Bawihtei hriat lohin ka țap ru ziah a, a puitling záwk hi ka insûm thei lo țhìn. Naupang ta chu, school ațanga a rawn haw, in a rawn thlen hma deuh hian," Nu..??"  tiin a rawn au vau vau țhìn a, chu chuan min vèl leh țhìn bawk a, mipa hi ka mipa zo lo leh țhìn a ni. Engtikah nge lusùn lunglèn leh khawharna hian min kiansan theih ang le? Hun a duh rei dâwn hian ka hre êm mai.

~~~~~~~

"Duata, Chhani lung kan phun chuan i lung a dum meuh maw?" tia ka nu min biakna chu ka hre lo lek lek thei hial. Chhani hriat rengna lung kan phun chu ka lo thlêk nasa deuh a ni, ka theihtâwpa mawi leh țhaa ka hriatin ka siamtîr ve bawk a, ka lung pawh a âwi viau e. Hei tê mai hi a tâna ka tih theih tâwk chu a ni ta mai si a, mihring nunna hlut sizia leh thih hnua kan hlut tâwk tawh lohzia min ngaihtuahtîr a, theihtàwp ka chhuah vena pawh chu ho ta riaua hriatna ka nei deuh thut bawk.

"A țha tâwk lutuk tlat, duhthu pawh a sãm chiang e," ka ti sap a, puan fai chuan thlànlung chu ka hru fai leh rih a. Bawihtei'n," Àpi, haw tawh ang u," tia hla deuh hlek ațanga a rawn au làng láng tâkah chuan haw a hun tih ka hre chawpchilh nghâl a, hmanhmawh deuh tak chuan thlànlung chu ka han hru leh thuak thuak a, basket-a pangpár ka khàwi chu thlànlung nghèng chuan ka dah a, ka thlêk leh vang vang hnuah zàwimuangin Chhani thlànlung chu ka kalsan zui ta a.

A thlànlung phun tawh mah ila nupui neih leh lam a lang chuang lo. Fela pawhin min chhuahpui ve fo a, min sawipui zauh zauh bawk. Lung ka phun hma pawha min lènpuitu kha a ni a, lung ka phun zawh hnuah phei chuan min lèn chhuahpui hi a chãk et et ni maiin ka hria. Kei pawh hian lèn chu ka hnial êm êm lo nain ngaihzâwng neiha nupui neih leh hi chu rilruah a awm lêm lo.

Hetia ka pathlàwi hnu hian, nulaho hian pathlawi hi an lo làwm deuh nge ni dâwn ni, ka tlangvàl lai ai mah khân ka luck ta em maw ni chu aw ka ti. Phone-a min rawn text-tu ka tawng nawlh nawlh a, min duh thu min hrilh tâwk lah bo bîk lo, kei hian thu tak hla takah ka ngaihsak duh ngai lo thung a, a țhen chu an beidawng ve a, min be chhunzawm zêl pawh an awm ve tho.

Chûng zîngah chuan Fela hian pakhat min sawihmuh a, kan vênga mi pawh a ni lo. A hmêl chu a chhe miah lo, a ngo êm êm lo va, nula hmai sîn lam deuh niin a fel fai reuh phian bawk. Lung ka phun hma ațanga min betu a ni a, lung ka phun hnuah pawh a chàwl duh chuang lo. Ka chanchin hre vektu a ni a, nupui sûn leh fachuam ka nei tih leh kan chhûngkhur chanchin zawng zawng pawh a hre vek nghe nghe. Chuti chung chung pawh chuan min iai lo ve tlat a, kei pawh a lakah ka rilru a dang ve deuh hlek tho. 

"Zanin chu Manuni rîm ang aw, rilru leh tihtakzetin kan rîm ang," vawiin ka dàwr nghah laia Fela rawn kalin a tih avàngin lêng chhuak tùr chuan ka insiam a. Chutia ka insiam lai chuan Bawihtei a rawn lût a," Pa, eng nge i tih dâwn? In committee dâwn em ni?" a rawn ti nghâl a, kei chuan," I pa Fela nèn kan chhuak lawk dâwn a nih hi," ka ti phawt a, a hmêl enin ka inher a," Ka chhuah hlànin lehkha țha deuhin lo zir la aw, ka rawn haw har lo ang, " ka ti leh a.

"Aw, test tùr kan nei a, pakhat thiam chian loh ka la nei a, chu chu ka zir dâwn," a lo ti vat a, room aţang chuan a chhuak zui ta nghâl a. An test tùr chu ka lo hre miah lo chu niin, a ngaihtuah lohthlâk ka ti a, zahthlâk ka ti deuh bawk. Fanu pakhat ka nei ve a, a zirlai pawh ka hriatpui lo tihna a nia, pa nih ka tlin lohzia chu ka inhre nawn awn awn mai.

Fela car kan hawl chhuak a, Manunite vêng lam pan chuan kan tlãn chhuak ta vang vang a. Kawnga kan tlàn lai chuan Fela chuan min fiam zauh zauh a," A duh reuh tho che sia, a chhe fahran lo bawk nèn, neih tum ngei rawh aw," a ti sauh sauh a, a phûr hmêl chuan ka nuih a tiza angreng.

"Neih te zawng, keini ang pathlawi chu ani, nula hnahkhat tân chuan sitawm deuh asin kan nih, min duh tak tak teuh lo mai!" uar zet hian ka lo ti ve thung a. Ani erawh chuan," E khai! I hre chiang lo a nih chu, nula hnahkhat hian tlangvâl pângngai aiin pathlawi zei, tawn hriat tam tak lo nei tawh hi an duh daih záwk!" nui vur vur chung hian a lo ti leh a.

*I NGAIHDÀN KHA MI ZAWNG ZAWNG NGAIHDÀN A NI KHER LO A NIA, I NGAIHDÀN AN ZÂWT CHE A NIH LOH CHUAN SAWI CHHUAH KHER A NGAI LO*