☆RINAWMIN☆ - 15 By Dingdi Pachuau

☆RINAWMIN☆ - 15 By Dingdi Pachuau

Manunite hi kan khaw țhenawm lawka awm an ni a, ka hriat ngai loh mi chu a ni lêm lo; mahse, ka bèl chiang ngai lo va, ka bèl bul ngai hek lo, kohhran khat kan nia, ka hre ve a ni mai. Chhani dam loh lai pawh khân a rawn kan ve ngei a, a boral hnuah pawh râlin a rawn kal leh tih a sawi bawk. Min hre chiang viau dâwn a, a sawi dàn hmangin, ka dinhmun hre sa veka min la duh cheu tak tak a nih chuan  ka tân pawh hnial viau a harsa maithei, a chhan pawh kei chu duh thlang thei, duh duh thing thei ka ni tawh lo va, keiina ka va duh viau lam ai mah chuan ka fanu leh ka chhûngte min hmangaihpui thei tùr ka zawn thiam a ngai dâwn a ni.

An in kan luh lai chuan an lo awm ve nak nak hlawm a, tleirãwl lam deuh hlîr an ni; mahse, an chhûng zînga mi an ni lo hlawm a ni ang chu, min chiauaua kan țhut hnu lawkah an chhuak ta phak phak hlawm a, Fela chuan," I in lêngte kan hnawt țiau vek a ni maw?" a han ti a, ani erawh chuan," Ni nâng, naupang an nih kha, lucky ticket an rawn zuar a," a lo ti vat a, chutah," In fel hlê mai! Ka lo beisei sâng ngam lo che u a," a lo ti a, Fela ka han melh a, ani erawh chuan min rawn en eih lo, a nui vur vur ringawt. A lo be lâwk thlap a ni chiang mai, țhiana hi chu aw...!!

U hmeichhe pahnih a nei a, pasal an nei ve ve tawh nain pakhat hian a pasal a sûn ve tlat mai a, an inah a rawn lêt leh ringawt a ni àwm e. Chu pawh chu room ațangin a rawn chhuak a; mahse, a lût leh thuai a, a rawn lang nawn tawh miah lo.

Thuphung pângngai sawiin kan titi a, titi pahin kan in chhûng chu chîk takin ka en kual ve a. An in hi a zau ve pângngai a, choka leh sitting room pawh a awm hrang thlap mai. Hausa deuh niin lang lo mah se an khawsak a harsa hran lo tih in chhûng lam an chei dàn ațangin a hriat theih ruak a, kan titi ațang chuan an chhûngkaw chanchin ka hriat belh țeuh bawk. Pa ber hi kut themthiam tak mai a ni a, furniture workshop pawh kawng chhak lamah a nei nghe nghe a ni àwm e, nu ber ni se puan țhui thiam a lo ni lehzêl bawk a, an harsa lo pawh hi a àwm reng mai.

"Manun, in khuaah hian țhalai in tam riauin ka hria," thingpui in tùr min rawn pëk lai chuan Fela chuan a ti a. Ani chuan," Aw, tam ve a ni mai, a khaw in ding zât ngaihtuah chuan; mahse, hmun dangah hian an awm chhuak ve hlawm a, kum tàwp lamah hian kan tam ţhin," a lo ti ve mai bawk a, ka piah lawkah chuan a rawn țhu a.

"Nula hmël țha pawh in tam dâwn a nih chu," Fela chuan a ti leh a, a nui sûng zui a. Manuni pawh chuan nui hmêl pu chung hian," Țhalai an tam chuan hmël țha ve deuhte pawh an awm ve nual tùrah ngai ta ila, tunah phei hi chuan hmun danga awmte hi an chhe lo thei lutuk a," a lo ti ve leh a.

"Țhianpa tân hian maw le, ka han melhpui duh deuh a; mahse, nang i awm reng laia mi dang melh daih pawh chu a tih chí dâwn loh riauin ka hria a, ni lo'm ni?" inla zei zeta a tih chuan Fela chu ka melh hrãwk a, min lo en ve duh dèr lo. Manuni chu a nui hak hak a," A, U Fela țhìn hi a, keinite zawngin a lung kan dum phãk teuh lo mai! Kan fel bawk si lo," a lo ti a, nula fel pângngai tak chu a ni ngei mai.

Kan lêng rei lutuk lo. Bawihtei ka ngaihtuah ve deuh a, naktûkah an test dâwn bawk si a, chhuanlamah chu chu ka hmang a, bâkah zàn khatna ațanga rei deuh men chu ka duh lêm lo.

Haw kawng tluan chuan Manuni chanchin chu a sawi a, fel a tih thu leh kan pafa tân pawh a țhat a rin thu chu min hrilh dût dût reng a, kei erawh chuan lo inrawlh lovin a thil sawi chu ka lo ngaithla tawp. A dika dika sawi chuan nupui neih leh lam hi chu ka lo ngaihtuah êm êm hran lo va, Bawihtei hi ka ngaihtuah ber a, ka nawmna aiin a nawmna ka dah pawimawh zâwk. A hrehawmna a nih dâwn chuan nupui neih leh ka duh lo, a pi leh pute nèn tihian kan chêngho dial dial reng mai a ni ang chu.

Fela berin min fiam dût dût reng avàngin ka nute pawhin an hre lo thei lo va, an lo bengkhawn khawp mai niin. Min zâwt chhên mai a, kei erawh chuan chhàn dàn ka hre vak lo, kan inngaizâwng pawh a ni si lo va, zàn khat kan lêng ve satliah kha a ni mai si a.

Ka nu erawh chuan a bengkhawn lutuk tlat." Duata, a pa pawh ka hre lutuk alawm, an kohhranah upa êm la ni rih lo mah se a ni vat ang, a pa ațangin mi sual tak a ni dâwn lo, hei Chhani pawh a boralna a rei ve ta a, lung pawh i phun thlap tawh kha. Tu mahin an dem tawh lo ang che, i la upa êm êm lo, kum 40 êm pawh i la tling lo a nia, i duh phawt chuan kan hnial dâwn hauh lo che," a ti barh barh a, ka pa pawhin," Ngun takin ngaihtuah la, kan tur lui dâwn hauh lo che; mahse, kawppui hi chu nei duh leh la chu ka ti, kan chhûngkhur pawh hian a mamawh a ni, chutiangin Bawihtei pawhin nu a mamawh ve tho a nia," a lo ti dap dap a.

"Kan inngaizâwng lo a nia, zàn khat kan lêng ve chauh alawm," ka tih chuan," A làwmawm tho alawm, nula inah i lêng ve leh ta a nia. I u Zovi pawh a phùr teh kha," ka nu chuan a lo ti vat a, a nui hak hak a, thâwk ka la hawk ringawt. Han phùr viauna tùr a awm pawh ka hre lo a nia, ka chhûngte hmeichheho hi zawng eng emaw hlekah hian an lo phûr hlut zêl.

*******

Tunah zawng ka fanu pawhin ka bula mut a duh tawh bîk lo. Thla thum kalta ațang khân room a nei hrang a, kan in kan lo sa țha ve ta bawk nèn, amaha room hrang neih kha a duh ve ta tlat mai a, ka hnial lêm lo. Puitlin kawng a pan chho ve zêl a, nakin lawkah chuan mi ang a niha a hmu zo ve a nih chuan pasal min la neihsan ve ang a, puitlin a zir chhoh hi a țha.

"Âpa, nupui nei tawh la ka ti. Àpiin a sawi țhin nula kha, a fel hrim hrim ang, a duh ve tho ang che, i fel ëm hi, tiraw?" tiin a nui sak a, a nui hmêl chuan a nu min hriat chhuahtîr zui zat mai. An inang êm mai a, a hmêl ka hmuh hi chuan a nu ka hre chhuak zêl dâwn zawng a nih hi.

"Nu neih ka châk ve tawh bawk a, School-a parents' meet kan neihin nangmah chauha lo kal a ngai tawh bîk lo ang a, in pahnihin in rawn kal dùn thei ang a, a nuam dâwn asin, ka țhiante bulah pawh nuam ka ti ngawt ang, anni pawh an nu leh pate zêl alawm lo kal ţhin," Bawihtei bawk chuan a ti leh a, min en lo chuan a chawhmeh chan lai chu a chan pah mawlh mawlh reng a. A thil sawi zet chu,  chûng thleng thleng chuan ka lo ngaihtuah ve ngai miah lo!! Ni e, nupui hruai tùr nei ve lo ta chu, keimahin ka kal mai zêl a, ka hman ngang loh chuan ka nu a kal ve mai zêl bawk a, Bawihtei tân hian a lo hrehawm ang tih ka lo ngaihtuah thleng ngai miah lo.

A piin a fuihpawrh êm chu ka ring lo deuh a, hetiang thu ka bula a sawi ve mai hi mak ka ti a, nupui nei leh ngei tùra min duh vàng a ni ang em? Nge, a sawi ve mai mai ni ang? A pi hian a bulah lo sawiin nupui nei leh tùra thlêm ve tùrin a lo hrilh zâwk em ni ang?

"Bawihte, nupui ka neih chu i duh tak tak maw? I piin sawi tùra a tih vàng che a ni zâwk em?" tiin ka han zâwt leh rih a, ka nu chuan ka thu sawi chu lo hria se chuan a duh lo ngawt ang le; mahse, a hre chuang lo va, a pawi lo.

"Àpi chuan eng mah min hrilh lo, i bialnu ni àwm tak thlalâk erawh kha chu min hmuh a, hmêl țha ka tih leh tih loh min zâwt a," a lo ti leh a, a chawhmeh chan zo chu thovin tui dehnaah a kalpui nghâl a, keiin tël ka lo chhuang ve bawk a.

"Nu neih chu ka châk tak tak alawm, i khawngaihthlâk a, bâkah, Sunday zînga inkhâwmnaah kalpui tùr nei ve la ka ti bawk a. Chuan, eirawng ka bàwl reng a ngai lo ang a, chhuat nawh pawh ka ãwl ve deuh thei tawh bawk ang a," a tih leh duah chuan ka nuih a za tak tak, ka nui chhuak hawk hawk a. Hetianga za taka ka nuihna hi a va rei tawh tak ëm tih ka ngaihtuah chhuak zui zat bawk.

Manuni nèn pawh kan inkawp ve tawh a, thla 7 lai a ni tawh nghe nghe; mahse, khua hmun lo ta chu, in sain ka buai ve êm êm reng a, ka lêng reng hman bîk lo a ni. Ani pawh a vui ve dâwn dâwn țhìn a; mahse, ka buaizia a hre ve tho a, min hre thiam leh țhìn. Ni tla vanvuaiin hna ka thawk ve a nia, chauh a na thei êm êm a, kei lo che thei dang an awm si lo, ka inbual zawh hi chuan khuma mut tawp ka thlahlel ber țhìn. Tunah chuan ka hna pui ber ka zo ta bawk a, Manuni pawh ka ngaihsak hman ve leh ta, vawi thum lai ka lêng ve leh tawh nghe nghe.

Kei akâr min duh thiam ve êm êm mai a, ka tân ui a nei ngai lo. A káwng achin chung lam zawng hi chu engtiklai pawhin a phalrai a, kei pawhin ka duhthawh thei țhìn hle; mahse, ka inthunun hrãm hrãm zêl a, chêtsualpui ka tum ngai lo. Ka nihna ka theihnghilh ngai lo va, Chhani nèn khân kan duhthawh luat avàngin Dàn thianghlimin kan innei thei lo kha a nia, nupui ka nei leh a nih ngai chuan kan inneih hma chuan sex ka hmanpui tawh lo ang tih rilru ka pu tawh a ni, tlangvâl hawklak mai mai rual ka ni tawh lo bawk a, kohhran mite mai bâkah min hmu rengtu Pathian pawh a zahawm tawh.

"Engati nge min mutpui hi i tum ngai miah loh a? Kan free theih tehlul nèn," tiin zàn khat ka lêng chu min zâwt ta nghe nghe a, veranda thlang lama țhuthlèngseiah kan țhu a, kan țhu chêp dùn viau lehnghâl.

"Khawih chhiat che ka duh lo a ni, thianghlim takin inngaizâwng ila ka duh a, mihring duhna ringawta kan kal zawngin rei kan daih loh ka hlau a ni. Châk lo ka ni bîk lo; mahse, ka châkna hi tihpuitlin loh kan pahniha tãn hian a țha ber a ni," ka ti dap dap a, chutih rual erawh chuan ka kut erawh a awm mai mai leh chuang miah lo.

*PÂWN LAM MAWINA HIAN REI A DAIH THEI LO VA, CHHÛNGRIL NUN A THUP REI THEI TAK TAK HEK LO*