☆RINAWMIN☆ - 16 By Dingdi Pachuau

☆RINAWMIN☆ - 16 By Dingdi Pachuau

"Innei tawh mai ang, min nei tawh mai la, kan tân pawh insùm reng a ngai tawh lo ang a... chuan, i fanu leh i nu leh pate tân pawh mi țha tak nih ka tum ang," kan ngawih vang vang hnu chuan a rawn ti chhuak ta hliai a, ka kut a ninhlei deuh avànga a thâwk dàn danglam chu ka hre chiang ngang mai.

A hmeichhia zâwkin min han sâwm hmasa zâwk ta chu a nia; mahse, a zah loh hrim hrim vàng a ni lo tih ka hria. Kei a mipa zâwk hian ka sawi chhuak ngai si lo va, a insûm thei tawh ngang lo a ni ngei ang, ka benghawn loh vàng vek, hetia a sawi chhuak hi min duh leh min thlâkhlelh tak tak vàng a nih ka ring hmiah bawk; mahse, chutih rual chuan kei hi nupui nei leh tùrin ka inpeih tawh tak tak em? Ani hi ka hmangaih chiah em? Ani pawh hian min hmangaih chiah em?

Zàn ka mu chu ka inngaihtuah nasa hlê mai a, mut pawh ka muhìl țha lo hlê a ni. Nupui hi lo nei leh dawn ta ila, Bawihtei hian hrehawm a ti viau ang em? Ani kha chuan nei leh tùrin min ti ngei kha a nia, nu neih a châk thu pawh a sawi nghe nghe a nih kha. Nei ta chiah ila, a rin ang ngawt  kha a lo ni kher lo ang em? Sawi ngam lovin hrehawm ti deuhin a lo awm ang a, chhûngkua kan buai phah zâwk ang em? Ka nu leh pate pawh hian ka neih leh kha chu an duh ngei mai a, Manuni ngei pawh hi an hmuin an hre ve viau tawh a, an duh loh thu an sawi miah lo. 

Mahse, keimah lam ber hi, nupui neih ka han ngaihtuah a, Chhani neih ka tum lai kha ngaihtuah chhuakin, tunah hian khatiang rilru kha ka pu ve miah lo, ka phûr êm êm hran miah lo nia. Eng nge a chhan pawh ka hre chiah lo, Manuni hi ka duh ve viau tho bawk sia, eng nge maw a awmzia ni le? Nupui nei leh tùr hian ka la inpeih chiah lo em ni zâwk le?

*******

"Zanriah ei khamah rawn kal lawk teh aw, thil sawi dùn lawk teh ang," tia Fela'n min rawn phone avàng chuan chaw ei kham hnu lawkah an in lam panin ka inkhalh chhuak a, eng lam nge kan sawi dãwn pawh ka hre bîk lo, a sawi chiang si lo va, eng emaw harsatna a nei pawh a ni maithei a ni.

A room-ah min ko lût nghâl a, mak ka ti angreng kher mai. A awm dàn ațang chuan eng emaw tak, thil țûl tak kan sawi dùn dâwn a nih ka ring thiam nghãl mai a, a hmêl a tak rèn rùn bawk nèn, fiamthu lam pawh a lang thei lo.

"Țhu rawh, eng mah kha ka sawi chiang si lo va, i rawn bangbo àwm mang e ka ti leh hnuhnawh a," a han ti thüm dût a, kei pawh chuan," Nia, zêp loahah chuan bangbo angreng, a pawimawh hmèl bawk sia, ka hre châk viau a ni," ka lo ti ve a, ka nui pah bawk a.

"Ngawi rawh lawk, thingpui hâng in lawk ang," a ti leh rih a, room ațang chuan chhuakin thingpui no hnih a rawn chawi lût a, no pakhat chu a lian țha khawp a, a in tùr zâwk a ni tih pawh hrilh ka ngai lo, thingpui hâng a hehzia ka la theihngilh tlat lo a ni.

"Englo a nia, Manuni chungchâng hi sawipui che ka duh a, ka sawihmuh hmasak che kha a ni miau mai si a," a ngawih deuh vang vang hnuah a rawn ti ta a, ka rin loh lam daih a nih avàngin ka lo en reng ringawt.

"Vawiin khân ka hmu a, Lungleiah. Amah chauhin a ni lo va," a tih leh chuan," Chhùna kan inbiak lai kha chuan a nawmsam vak loh thu kha a sawi a, a mu deuh reng niin a sawi sia," ka lo ti a," A inentîr em maw ni dâwn le?" ka ti zui leh zat a. Ani chuan," Ka hmuh lai kha chuan han nuamsam lo hmêl a put pawh ka lo hre lo, a dam mah mah zâwk em aw ka lo ti mai asin," a lo ti ve thung a, a ngawi dat phawt a, chutah," Manuni hian a kawp che niin ka hria, vawiina ka hmuh kha a bialpa a nih ngei pawh ka ring a, a dik ang tih pawh ka ring thlap. An awm dàn ațang kha chuan hmêl hriat satliah chu a ni thei lo," nghet charh hian a ti leh a, a thil sawi avàng chuan a hmêl ka en vat nghe nghe. Ka hre sual lo, fiamthu min hrilh hmêl pawh a pu chuang lo bawk.

Kan ngaihtuah nasa deuh a ni ang, kan ngawi dùn deuh reng a, chumi hnuah țawng chhuak hmasaah țangin," I hmu sual chu a ni si lo maw?" ka ti a, dik tak chuan zanin pawh hian lèn tum ka ni a; mahse, ka lèn lohna chhan chu a nuamsam si lo va, mut hahdam a tân a nawm zâwk ka rin vàng a ni.

"Aw, hmu sual lo, min rawn hmu ve lo hlauh a, ka hmu chiang khawp mai. Țhianpa, i rilru i pe ve viau tawh a ni tih chu ka hre tho a; mahse, i la tlãi chhe chuang lovin, nupui atân êm i la nei lo bawk a, harsa deuh dâwn mah se țhen mai tùrin ka duh che a ni. Nakina rilru na taka i awm loh nân chu chu a țha berin ka hria," Fela chuan a ti leh dût dût a, ka bulah rawn kalin ka dàrah chuan a rawn bêng thak thak a.

"A țha ber ang," ka lo ti ve ta ngawt a, Chhanite a hmuh dàn chu zawh ka duh viau nain ka zâwt hreh deuh si a, ani lah hian sawi tum hmêl a pu dèr si lo. Dâwt min hrilh erawh a nih ka ring hauh lo va, a sawi chhuah duh loh dànah hian engtin emaw chuan an awm ngei a, a hmu chiang viau a ni tih a hriat, a sawi chhuah țhat duh loh dànah ka rilru a nat viau a hlau a ni chiang mai.

"Lungngai suh aw, mi dang țha deuh, mi rinawm lutuk tak mai, nangma tân chauha rinawm tùr, nupui țha deuh i hmu leh ngei ang. Manuni zawng, nei mah la, engtik hunah emaw rilru na takin i awm tho tho dawn, chumi hmaa i thlah fel hmak hi a țha a ni, nang tluka țhian țha ka nei lo tih i hre chiang a, i tân chuan a țha ber ka duhpui che," Fela chuan a ti leh dap dap a, ka lo bu nghat ringawt, ka ngaihtuahna erawh a va vâk thui si êm!!

Ka haw har deuh a, ka haw veleh rilru nuam lo deuhin ka mu zui nghâl a, Manuni ka bia ang nge be lo ang tihah ka rilru a inhnial a; mahse, biak rih loh țhaa ka hriat avàngin ka be ta lo. Dâwt min lo hrilh reng a nih chuan... ka zâwt chhuak dáwn, ni lo, amahin a sawi chhuak ngei ang.

A tûk lamah chuan pângngai takin min rawn bia a, nizàn lama ka lèn loh chhan min rawn zawh pahin min lo beisei reng thu a sawi tel bawk. Chhuanlam ka hriat remchâng ber chu ka hrilh tawp a, ani pawh chuan min hriat thiam thu chu sawi zui zatin," I buai theihzia ka hria alawm, kan ka ngai êm êm hran lo a nia,  buai chung chungte khân min rawn kan tum lo la; mahse, i ngaihawm chu ka ti reng," a rawn ti a, khum ațanga a thawh chhuah peih thu leh chaw pawh a ei peih thute chu a rawn sawi tak siam siam a, a thil sawi vél dàn, a țawng dàn ațang chuan dâwt han sawi tawp a ang si lo va, Fela khân a hmu sual zâwk em ni aw te ka ti rilru hial mai; mahse, țhian țha kârah a hmuh sual mai mai thu tak bàwla a bàwl chu ka ring bawk si lo, rilru put dàn thiam a har ka tih viau rualin tih dàn tùr erawh ka ngaihtuah pah vang vang a.

Remchâng hmasa berah lêng tùrin ka chhuak leh ta a, Fela tel lovin. An in ka luh chuan in lêng dang pawh an lo awm ve a, ka lêng dâwn tih hi ka hrilh lâwk duh miah lo a, min hmuh pawh chuan mak a tih hmèl viau bawkin ka hria.

A pain min lo bia a, kan vêng lam chanchin min zâwt pahin kohhran lam chanchin min zâwt zui a, kan inchhàn lai chuan in lêng pakhatin," Naktûk zàn chu Manun, a châkawm tawh i ti em? A nuam dâwn nasa," a tih chu ka hre thei a, ka țawng lai pawh ka tàwp deuh chat nghe nghe a; mahse, ngaithla anga awm chu a dikin ka hre lo deuh a, ka țawng chhunzawm leh tho nain ka beng erawh an thil sawi lamah ka lèn pah deuh tho.

Manuni chuan," Min telh ve lo rih phawt teh u, ka nawmsam loh hi," a ti a mipa aw hian," I dam mai ang, a damdawi kan hre țha alawm," a lo ti leh a, a nui pah bawk. A aw ațangin zawhna záwttu kha a ni tih ka hre thei, Manuni pa ka chhànna pawh chu a mumal lo viauin ka ring.

"In ninawm e a!" Manuni chuan a ti hlak a, a tho a, thingpui min rawn pe dawn a ni ngei ang, ka in châk viau pawhin ka hre lo. A in lêngte nèn hian nakzànah eng emaw tak tih an tum tih a hriat a, dam țha lo inti ve si, khawiah emaw a chhuak daih dâwn tho si lai tak chu hriat thiam a har ka ti.

Thingpui min rawn pêk hnu chuan a pate pawh an inthiarfihlîm ve deuh țan a,' Fanu in lêngte bula lo awm ve reng zawng, nula kan ni ve mang si lo va' nui chunga tiin an kal sawn a, an fel nupa ve a, min hre hnehsawh ve tawh bawk nèn, an ina ka lèn pawh hian min be bawrh bawrh mai țhìn.

In lêng dangte chu an haw mai dâwn emaw ka tih laiin hàwn mai an tum bîk awkawng lo mai niin, kan țhu țhãm a. Pathum lai an ni a, an hmël erawh a inang lo hlawm viau, pakhat țawng duh deuh a awm a, a țawng deuh zat zat reng a, pahnih dang chu a țawng këp titih a ni mai, tlêma insawithei deuh ang chi hi a ni zui a, hun thâwl hek hawk neiha titipui hrep a châkawm! Pakhat dang a rawn țawng ve zauh zauh bawk a, Manuni a biak dàn vêlah chuan thu nei riaua hriatna ka lo nei, a intih-lal bãkah a inla ngêng ve pah bawk. 

Thingpui vawi hnih inna tùrah chuan ka tho ta a," Ka'n haw tawh ang e, i lo dam țha zêl dâwn nia," ka ti a, ani  chuan," A la hma alawm, thingpui in leh phawt la," a lo ti a; mahse, ka tum lo, a țhutna ațangin a rawn tho lo va, zàn danga min thlah anga min zui chhuah kha chu beisei tinah ka tin tawh hek lo. Ka haw vang vang ang a, ka lêng leh ngai tawh lo ang.

Mut hmunah a in lêngte titi kha ka ngaihtuah lêt a, Fela sawi kha a lo dik chiah tih pawh ka chhût thiam bawk. Lungleiah khân a kal chiang a, Inla-ngênga nèn ngei khân an ni tih ka hre chiang bawk, ka haw dâwna Manuni hmêl tîm deuh dai ațang khãn ka man thiam vek a ni tih pawh a hre chiang bawk tih ka hria, engkim tàwp vek rawh se. Phone chu ka tuai let ka tuai let a, a hming hmet chhuakin thu ka han type char char a; mahse, ka náwt reh leh ta vek, țhenna thu hrilh kher lo pawhin kan ințhen tho dâwn, mipain țhenna thu hrilh hmasak zâwk zawng, hmeichhia tân a nuam lo palh ang e, a tlàwmthlâk àwm êm mai.

Ka lèn zàn ațanga a zàn thumnaah Manuni'n pasal a ûm thu chu ka hre zui ta zat a, a tìrah chuan mak ka ti a, a hnuah erawh mak ka ti lo. A lo rai mêk tawh a lo ni nghe nghe!! Ka bengvàr lohzia chu ka ngaihtuah a, pasal úm ngai khawpa a awm thei chu mak ka ti a, kohhrana inhmang êm êm tho si, chutia a nun a hmang chu mak ka ti bawk. Thil lo mak theihzia hi aw!!! Mahse, thlèmna a do zo bîk lo a ni mai, keini pawh kan nu Chhani nèn kan chêtsual ve tho kha, dem viau thei ka ni bîk lo tih ka ngaihtuah chhuak leh ta vat a; mahse, min lo kawp reng chu mak ka ti tàwp thei lo, tlàwmthlâk ti viau mah ila tihngaihna dang awm hek lo. Ka nute beiseina mei a mit tùr erawh ka khawngaih khawp mai, Bawihtei lahin nu a awh thu a sawi ve chàmchî si a, an duh angin thil a thleng ta si lo.

*HARSATNA HI TU TÃ BÎK MAH A NI LO*